FONSECA

 

Alonso III de Fonseca concibiu este Colexio baixo a advocación do apóstolo Santiago Alfeo (Santiago o Menor) e proxectou a construción do edificio sobre un solar propiedade da súa familia materna, edificio que acabaría sendo o conxunto arquitectónico que simboliza as orixes da Universidade compostelá. As obras comezaron en 1532 e prolongáronse durante varios séculos con diversas ampliacións e engadidos. 

Finalizadas as súas funcións colexiais, estas dependencias deron cabida, en distintas secuencias temporais, a estudos de Medicina, Farmacia, Económicas ou Filosofía e mesmo foi sede provisoria do primeiro Parlamento de Galicia. 

Na actualidade acolle a Biblioteca Xeral da Universidade, a Biblioteca América, o Salón Nobre e os espazos expositivos do Salón Artesoado, Capela e Claustro Alto.

O patio -centro nuclear do conxunto- acubilla coas súas esveltas pilastras, elegantes arcos rebaixados, galería superior, remates platerescos e espectaculares azaleas, a estatua sedente do fundador Alonso III de Fonseca realizada polo escultor Ramón Conde en 1996 con motivo do V Centenario da Universidade.