FACULTADE DE MEDICINA

 Por iniciativa de Eugenio Montero Ríos e con deseño do arquitecto Fernando Arbós y Tremanti, a Facultade de Medicina foi construída anexa ao Hospital Real (hoxe Hostal dos Reis Católicos), cunha fachada principal que se prolonga por toda a Rúa de San Francisco e da que destaca a súa portada con grandes columnas que soportan un tímpano que loce un curioso relevo en mármore realizado polo escultor Ramón Núñez que representa unha intervención cirúrxica. 

As obras comezaron en 1910 e prolongáronse ata 1928, ano da súa inauguración sendo reitor e vicerreitor, respectivamente, dous ilustres catedráticos de Medicina: Luis Blanco Rivero e Alejandro Rodríguez Cadarso.