COLEXIO DE SAN XEROME - REITORADO

 

O edificio da Reitoría foi orixinalmente construído para acoller o Colexio de San Xerome -como Facultade Menor de Artes- ao abandonar a súa localización orixinal no Hospital Vello da Acibechería en 1651. 

As liñas sinxelas da súa fachada marcadas polos dous balcóns corridos que percorren o primeiro andar, son interrompidas polo contraste do magnífico pórtico medieval que foi trasladado da localización inicial de Acibechería e afortunadamente incluído no conxunto do predio. 

A construción do edificio conformou o flanco sur da Praza do Obradoiro que, coa presenza da “Torre do Reloxo” nun plano máis posterior, constitúe a inconfundible identidade  deste conxunto. 

A mediados do século XIX, o Colexio deixou de funcionar e o edificio foi destinado a acubillar a Escola Normal Superior e, xa finalmente, a partir de 1975 pasou a ser sede da Reitoría da Universidade.