FACULTADE DE HISTORIA I

 O edificio da actual Facultade de Xeografía e Historia foi, en orixe, a sede central da Real Universidade de Santiago de Compostela. A construción inicial comezouse en 1774 sobre o solar que ocupaba un antigo noviciado de xesuítas que pasou a ser propiedade da Universidade despois da Real Cédula de Carlos III de 1769 pola que os bens da Compañía de Xesús en Compostela pasaron á USC con motivo da expulsión dos xesuítas. O primeiro predio, trazado por Ferro Caaveiro, constaba de dúas alturas cunha portada dedicada á deusa Minerva deseñada por José Ferreiro. 

Entre 1894 e 1904, por iniciativa do Ministro de Fomento compostelán Eugenio Montero Ríos, acometeuse unha importante ampliación do edificio engadíndolle un andar máis e realizando unha nova portada, acadando o aspecto que ten na actualidade. Esta nova portada, deseñada por Ramón Núñez Fernández e que substituíu á de Ferreiro, está concibida como un homenaxe -mediante medallóns e estatuas- aos próceres da Universidade: Fonseca, Diego de Muros, Gómez de Marzoa, Diego de Ulloa, Álvaro de Cadaval e o Conde de Monterrei.

Pola súa parte traseira, o perímetro da Facultade está marcado pola rampla ascendente de Tras de San Fiz -co seu gran muro que salva o desnivel coa Rúa da Ensinanza- e pola Travesía da Universidade que linda coa Praza de Abastos. Neste tramo, existe unha entrada que dá a un xardín no que está localizada á cafetería e unha porta de acceso posterior á Facultade.