FACULTADE DE FARMACIA

 O edificio da Facultade de Farmacia, deseñado e construído ao final da década dos 60, está proxectado cunha gran austeridade, que viña imposta pola precariedade de medios económicos que o país tiña neses momentos. Non obstante, está resolto cunha grande racionalidade funcional para o seu momento, ao segregar a área de aulas e biblioteca nun pavillón da zona dedicada a laboratorios e despachos, que se desenvolve en tres módulos perpendiculares ao primeiro.

Tendo en conta que ata ese momento os estudos de Farmacia viñan desenvolvéndose no histórico Colexio de Fonseca (ou de Santiago Alfeo), é importante destacar o grande protagonismo que adquiren en comparación os espazos destinados a investigación, o que vai supor un punto de inflexión, un cambio de rumbo no deseño dos novos edificios a partir daquela.