CASA DE EUROPA

 Edificio de estilo colonial que foi erixido como residencia dunha familia de banqueiros da burguesía compostelá no ano 1903. A casa pertencía á familia de Simeón García Olalla de la Riva (1823-1883) quen fundou unha saga familiar enriquecida coa comercialización de téxtiles ao por maior en Galicia, mais con actividades que tamén abarcaron a actividade bancaria, financeira e inmobiliaria. 

O seu centro de operacións estaba dende 1872 na rúa das Casas Reais, no edificio deseñado por Jesús López de Rego no que hoxe se sitúa o Arquivo Histórico Universitario.

A rehabilitación do edificio como residencia para profesores visitantes tivo lugar entre 1999 e 2000, segundo o proxecto redactado por César Portela e Arata Isozaki en 1998. O promotor desta obra de rehabilitación foi o Consorcio da Cidade de Santiago de Compostela, aínda que o edificio foi cedido á Universidade, que é quen o xestiona.