BIBLIOTECA DE CC XURÍDICAS E SOCIAIS "CONCEPCIÓN ARENAL"

 En 1997 Celestino García Braña foi autor do proxecto dunha biblioteca para acubillar os fondos de consulta relativos ás Ciencias Xurídicas e Sociais nas inmediacións das facultades de Dereito, Relacións Laborais e Ciencias Políticas e Sociais. 

A biblioteca é un volume compacto, con forte presencia acentuada pola súa pel de pezas pétreas. No seu interior, unha serie de patios rectangulares, estreitos e largos ábrense en diferentes alturas para introducir luz na súa base, que é a área na que se dispoñen as salas de lectura.

O edificio organízase en plantas máis ou menos especializadas, coa intención de prestar servizo aos distintos tipos de usuarios. Situando todo o depósito de libros nas plantas superiores preténdese facer flexible o uso do edificio fronte a novas necesidades e futuros cambios. De tal xeito poténcianse os usos afíns, mentres que se evitan interferencias non desexadas, derivadas dos distintos perfís de usuarios.